श्रीलङ्कामा शृङ्खलावद्ध विस्फोट, २०७ को मृत्यु

570

कोलम्बो —शृलङ्कामा आइतबार विभिन्न स्थानमा भएका शृङ्खलावद्ध विस्फोटमा २०७ जनाको मृत्यु भएको छ भने ४ सय ५० जनाभन्दा बढी घाइते भएका छन् । तीन चर्च र ४ होटलसहित ८ स्थानमा विस्फोट भएका हुन् ।
पश्चिमी तटीय सहर नेगोबोको प्रख्यात सेन्ट सेबास्टियन चर्च, पूर्वी तटीय सहर बाट्टीकालोआको जियोन चर्च र कोलम्बोको कोच्चिकाडे जिल्लास्थित सेन्ट एन्थोनी चर्च, कोलम्बोका ठूला होटलहरू सांग्रिला, किङ्सबरी तथा सिनामन ग्रान्ड, देहीवालाको एउटा होटल तथा देमातागोडाको एउटा घरमा विस्फोट भएका हुन् । विस्फोटपछि रक्षा मन्त्रालयले स्थानीय समयअनुसार आइतबार साँझ ६ देखि सोमबार बिहान ६ बजेसम्म कर्फ्यु लगाएको छ भने प्रमुख सामाजिक सञ्जालहरूमा अस्थायी रूपमा प्रतिबन्ध लगाइएको छ । सुरक्षाकर्मीहरूले ७ जनालाई पक्राउ गरे पनि आक्रमणमा कसको संलग्नता थियो भन्ने आइतबार साँझसम्म खुल्न सकेको छैन । इस्टरका कार्यक्रम भइरहेका बेला सबैभन्दा पहिला कोलम्बोको सेन्ट एन्थोनी चर्चमा विस्फोट भएको थियो भने त्यसलगत्तै नेगोम्बोको सेन्ट सेबास्टियन चर्च, बाट्टीकालोआको जियोन चर्च र कोलम्बोका तीन होटलमा लगातार विस्फोट भएका थिए । सातौं विस्फोट दक्षिणी कोलम्बोको देहीवालास्थित चिडियाखाना नजिकैको होटलमा भएको थियो ।
कोलम्बोको देमातागोडा जिल्लामा आठौं विस्फोट भएको अन्तर्राष्ट्रिय सञ्चारमाध्यमले जनाएका छन् । प्रहरी एउटा घरमा छापा मार्न गएका बेला आक्रमणकारीले आफैंलाई बमले उडाउँदा घरको छत खसेर तीन प्रहरी अधिकारी मारिएका छन् ।
सबैभन्दा बढी क्षति सेबेस्टियन चर्चमा भएको छ । त्यहाँ कम्तीमा पनि ६७ जनाको मृत्यु भएको छ । सामाजिक सञ्जालमा सार्वजनिक तस्बिरहरूमा चर्चको छत ध्वस्त भएको र कुर्सीहरू रगतले लतपतिएका र मानिसका कपडा यत्रतत्र छरिएका देखिन्छन् । बाट्टीकालोआको चर्चमा २७ जना मारिएका छन् । अधिकांश चर्चका छत विस्फोटले उडेका छन् भने सिसा यत्रतत्र छरिएका छन् । बाट्टीकालोआ अस्पतालले ३ सय घाइते भर्ना भएको जनाएको छ ।विस्फोटमा बेलायत, नेदरल्यान्ड, अमेरिका, टर्की, चीन, पोर्चुगललगायत देशका ३५ विदेशी नागरिक पनि मारिएको जनाइएको छ ।

LEAVE A REPLY

Please enter your comment!
Please enter your name here