हेटौंडा– छैठौं संस्करणको बागमती गोल्डकप फुटबल प्रतियोगिताको उपाधि मच्छिन्द्र फुटबल क्लबले जितेको छ। विभागीय टोली सशस्त्र प्रहरीको एपीएफलाई ४–० गोलको फराकिलो अन्तरले हराउँदै मच्छिन्द्रले सहज उपाधिमाथि कब्जा जमाएको हो । विजयी भएसँगै उसले १० लाख रुपैयाँ प्राप्त गरेको छ ।
बिहीबार बागमती गाउँपालिका– ८ स्थित जनता माविको खेल मैदानमा भएको फाइनल खेलमा मच्छिन्द्रलाई जित दिलाउने क्रममा विदेशी खेलाडीले गोल गरेका थिए । विदेशी खेलाडी क्रिष्टोफर चिजोवाले दुई र करिमले एक गोल गर्दा एक गोल भने उपहार पाएको थियो । खेलको १४ औं मिनेटमै करिमको गोलमार्फत मच्छिन्द्रलले अग्रता लिएको थियो । पहिलो हाफमा एक गोलले अघि रहेको मच्छिन्द्रले दोस्रो हाफमा ३ गोल थप्यो ।
५७ औं मिनेटमा चिजोवाले अग्रता दोब्बर पारे । ६२ औं मिनेटमा मच्छिन्द्रले एक गोल उपहार पायो । विदेशी खेलाडी स्टेफन समिरको प्रहार रोक्ने क्रममा एपिएफका डिफेण्डर कुलदीप कार्कीले आत्मघाती गोल गर्न पुगे । त्यसको एक मिनेट नबित्दै चिजोवाले गोल गरे ।
एकपक्षीय जस्तै देखिएको फाइनल खेलमा एपीएफले गोल गर्ने केही मौका पाए पनि सदुपयोग गर्न नसक्दा उप(विजेतामै चित्त बुझाउन बाध्य भएको छ। विजेता मच्छिन्द्रले १० लाख रुपैयाँ प्राप्त गरेको छ भने उपविजेता भएको एपीएफले ५ लाख रुपैयाँमा चित्त बुझाएको छ ।
मच्छिन्द्रले न्यूरोड टिम एनआरटीलाई र एपीएफले त्रिभुवन आर्मी फुटबल क्लबलाई हराउँदै उपाधि भिडन्त पक्का गरेका थिए । प्रतियोगिताको सर्वोत्कृष्ट खेलाडी मच्छिन्द्रका उत्सव राई घोषित भए । उनले १ लाख १ हजार रुपैयाँ प्राप्त गरे ।
उत्कृष्ट गोलरक्षक मच्छिन्द्रका प्रदीप भण्डारी, डिफेन्डर एपीएफका कुलदीप कार्की, मिडफिल्डर मच्छिन्द्रकै विशाल तामाङ, फरवार्ड मच्छिन्द्रका हिसुव थपलिया र प्रशिक्षक मच्छिन्द्रकै सन्तोष न्यौपाने घोषित भए । उनीहरुले जनही नगद २५ हजार रुपैयाँसहित ट्रफी प्राप्त गरे ।
