काठमाडौं । राष्ट्रिय मानव अधिकार आयोगकी सदस्य डा. लिली थापाले जेनजी आन्दोलनसम्बन्धी अनुसन्धान प्रतिवेदन सार्वजनिक गर्न ढिलाइ भएको भन्दै कडा असन्तुष्टि जनाएकी छन्। उनले आयोगले समयमै प्रतिवेदन सार्वजनिक नगरे आफूले नै सार्वजनिक गर्ने चेतावनीसमेत दिएकी छन्।
शुक्रबार काठमाडौंमा इन्सेकद्वारा आयोजित दुई दिने ‘प्रथम युवा मानव अधिकार रक्षक सम्मेलन’ कार्यक्रममा बोल्दै थापाले आफ्नो नेतृत्वमा रहेको समितिले दुई महिनाअघि नै प्रतिवेदन आयोगका अध्यक्षसमक्ष बुझाइसकेको भए पनि अझै सार्वजनिक नगरिनु गम्भीर विषय भएको बताइन्।
उनले भनिन्, “हाम्रो टिमले प्रतिवेदन बुझाइसकेको छ। बुझाइसकेपछि बिदा भनेर रोकिनु हुँदैन। प्रतिवेदनमा कारबाहीका लागि सिफारिस गरिएका विषयहरू बाहिर ल्याउनुपर्छ र सरकारसमक्ष पेस गर्नुपर्छ।” उनका अनुसार दुई महिना बितिसक्दा पनि प्रतिवेदन सार्वजनिक नहुनु पारदर्शिता र जवाफदेहितामाथि प्रश्न उठाउने विषय हो।
थापाले आयोगले आफ्नो जिम्मेवारी पूरा गर्न ढिलाइ गर्नु उचित नभएको उल्लेख गर्दै भनिन्, “यदि आयोगले प्रतिवेदन सार्वजनिक गर्न सकेन भने मसँग सबै विवरण सुरक्षित छन्, आवश्यक परे म आफैं सार्वजनिक गर्छु।”
उनले आफूले बुझाएको प्रतिवेदन आयोगको अन्तिम आधिकारिक प्रतिवेदन नहुन सक्ने भए पनि नागरिकले त्यसलाई स्वतन्त्र रूपमा मूल्यांकन गर्न पाउनुपर्ने धारणा राखिन्। “यो प्रतिवेदन सबै नागरिकले जान्न र बुझ्न पाउनुपर्छ,” उनले भनिन्, “प्रतिवेदन सार्वजनिक गर्नका लागि नागरिकले आयोगलाई दबाब दिनुपर्छ।”
राष्ट्रिय मानव अधिकार आयोगले गत भदौ २३ र २४ गते भएको जेनजी आन्दोलनका घटनाबारे अध्ययन तथा अनुसन्धान गर्न डा. थापाको नेतृत्वमा विशेष समिति गठन गरेको थियो। उक्त समितिले घटनासम्बन्धी तथ्य, निष्कर्ष र सिफारिससहितको प्रतिवेदन गत चैत ६ गते आयोगका अध्यक्ष तपबहादुर मगरलाई बुझाएको थियो।
