मकवानपुर । हेटौँडा–४, खोपेगल्लीस्थीत होटल आशीर्वादमा शनिबार वागेश्वरी टोल विकास संस्थाको आयोजनामा आगामी मंसिर २० गतेबाट हेटौँडा ११ मा सञ्चालन हुने सहिद स्मारक प्रिमियर लिगमा सहभागी खेलाडीहरूको अक्सन भएको छ ।
वागेश्वरी टोल विकास संस्थाका खेल संयोजक सुदिप श्रेष्ठको अध्यक्षतामा भएको खेलाडी अक्सन कार्यक्रममा गोल्फिन्टार किङ्स, बागथली वारीयर्स, नवलपुर टाइटन्स र थानाभ¥याङ म्याव्रिक्स गरी चार वटा क्लबहरूको सहभागीता रहेको थियो । प्रत्येक क्लबले अक्सनमा सहभागी भई रु. २५००० को सीमाभित्र खर्च गरी मार्की प्लेयरसहित अन्य १४ खेलाडी सोल्ड गरेको आयोजक सदस्य जिके बिष्णुले बताए । यस्तै लिगमा आमन्त्रित सहभागी क्लबको रुपमा रहेको हेटौँडा एकेडेमीले भने अक्सनमा सहभागी नभएको र क्लबसँग ९ जना खेलाडी रहेको र आज अनसोल्ड भएका खेलाडीमध्येबाट वडाबाहिरका ५ जना ग्रेडअनुसार खेलाडी प्रदान गरिने उनले जानकारी दिए । सबै क्लबले मार्की प्लेयरको रुपमा खेलाडी चयन गरीसकेका छन् । जसमा गोल्फिन्टार किङ्सले नविन शर्मा, बागथली वारीयर्सले मन्दिप श्रेष्ठ, नवलपुर टाइटन्सले असिम श्रेष्ठ र थानाभ¥याङ म्याव्रिक्सले विपुल खनाल र हेटौँडा एकेडेमीले विकास पटेललाई यसअघि नै मार्की प्लेयरका रुपमा चयन गरीसकेका छन् ।
कार्यक्रममा प्रमुख अतिथीका रुपमा बोल्दै बागेश्वरी टोल विकास संस्थाकी अध्यक्ष उर्मिला आचार्यले आफुहरूले स्थानीय खेलाडीहरूको प्रबर्धन गर्न थालेको अभियानमा सबै वडावासीले सक्रिय सहभागी भइरहेकाले खुसी लागेको बताए । उनले आगामी दिनमा सहिद स्मारक प्रिमियर लिगलाई निन्तरता दिने प्रतिबद्धता गरिन् ।
अक्सनमा ४२ जना वडाभित्रका खेलाडी र जिल्लाभित्रका तर वडाबाहिरका ४४ जना गरी ८६ खेलाडि अक्सनमा सहभागी रहेका थिए । उनीहरूलाई A,B, र C गरी तीन ग्रेडमा विभाजन गरीएको र उनीहरूको अक्सन मूल्य पनि फरक फरक राखिएको आयोजक सदस्य सञ्जय बिडारीले बताए ।
सहिद स्मारक प्रिमियर लिग आगामी मंसिर २० गतेबाट मंसिर २७ गतेसम्म हेटौँडा ११ मा रहेको हेटौँडा एकेडेमीको खेल मैदानमा हुने आयोजकले बताएका छन् ।
