हेटौंडा । रिकभरीङ नेपाल बागमती प्रदेश समितिको साधारण सभा आइतबार भरतपुरस्थित होटेल ग्लोबल, चौबिसकोठीमा सम्पन्न भएको छ। सभामा प्रदेशभरका पुनर्स्थापना केन्द्र, सदस्य संस्था तथा सरोकारवालाको उल्लेखनीय उपस्थिति रहेको थियो।
कार्यक्रमको अध्यक्षता प्रदेश अध्यक्ष दिवाकर राज श्रेष्ठले गर्नुभयो। कार्यक्रममा केन्द्रीय उपाध्यक्ष ध्रुव के.सी. प्रमुख अतिथि, पूर्व केन्द्रीय अध्यक्ष शान्ता घले विशिष्ट अतिथि तथा केन्द्रीय सदस्य सन्दीप शाक्य र शौजन क्षेत्री डि.सी. अतिथि रहेका थिए। कार्यक्रम प्रदेश फोकल पर्सन मनिश मान श्रेष्ठले सञ्चालन गरेका हुन् ।
सभाले बागमती प्रदेशभित्र पुनर्स्थापना सेवा, उपचार पहुँच, हानी न्युनिकरण कार्यक्रम, पुनर्स्थापना केन्द्रहरूको दर्ता–सहजिकरण तथा समुदायमा सेवाको पहुँच विस्तारसम्बन्धी विषयमा केन्द्रित छलफल गरेको थियो। फोकल पर्सन मनिश मान श्रेष्ठले प्रदेशस्तरीय चुनौती, नीतिगत अवरोध, सदस्य संस्थाको तथ्याङ्क तथा आगामी वर्षका रणनीतिक प्राथमिकता प्रस्तुत गरेका थिए।
प्रमुख अतिथि ध्रुव के.सी.ले नशा सम्बन्धी समस्याको समाधानमा राज्य–समुदाय सहकार्य अपरिहार्य भएको उल्लेख गर्दै रिकभरीङ नेपालको भूमिका प्रदेशमा प्रभावकारी रूपमा निरन्तर रहेको बताए। उनले उपचारको सहज पहुँच, पुनर्स्थापना केन्द्रहरूको गुणस्तर तथा समुदायमा सेवाको पहिचान विस्तारलाई सबैको साझा प्राथमिकतामा राख्न आवश्यक रहेको औँल्याए।
सभामा सहभागीहरूले प्रदेशमा पुनर्स्थापना सेवा दर्ता प्रक्रिया सरल, पारदर्शी र सबैका पहुँचयोग्य हुनुपर्नेमा जोड दिए। यसै क्रममा बागमती प्रदेशले समुदायस्तरमा पुनर्स्थापना तथा हानी न्युनिकरण सेवाको पहिचान र विश्वसनीयता बढाउन एकीकृत अभियान सञ्चालन गर्ने निर्णय गरेको छ।
नयाँ नेतृत्व सर्वसम्मत निर्वाचित
साधारणसभाले पुरानो कार्यसमिति विघटन गरी नयाँ नेतृत्व चयनका लागि निर्वाचन मण्डल गठन गरेको थियो। ध्रुव के.सी. संयोजक, सन्दीप शाक्य र शान्ता घले सदस्य रहेको निर्वाचन मण्डलले सर्वसम्मत निर्णयका आधारमा नयाँ कार्यसमिति घोषणा गरेको छ।
नयाँ कार्यसमितिहरुमा अध्यक्ष दिवाकर राज श्रेष्ठ,उपाध्यक्ष रोशन सिल्वाल, गौरव ढकाल, यम गुरुङ , सचिव निरन्जन तामाङ,सह–सचिव गगन खत्री,कोषाध्यक्ष निर्मन बिडारी,सदस्य सुस्मिता गुरुङ, सरोज लामा, सुदिप गुरुङ, रिजेश के.सी., रमेश गुरुङ, रन्जित श्रेष्ठ चयन भएका थिए।त्यस्तै सल्लाहकारमा शान्ता घले, भरत घिमिरे, जानकी श्रेष्ठ चयन भएका थिए।
नव–निर्वाचित अध्यक्ष दिवाकर राज श्रेष्ठले आगामी वर्षमा पुनर्स्थापना सेवाको गुणस्तर वृद्धि, उपचार पहुँच विस्तार, नीतिगत अभिवकालन सुदृढीकरण तथा समुदायस्तरमा विश्वसनीय सेवा पहिचान विकासलाई प्राथमिकतामा राखेर अघि बढ्ने प्रतिवद्धता जनाए।
बागमती प्रदेश समितिका अनुसार कार्यक्रम सफलतापूर्वक सम्पन्न भएको छ।
