मकवानपुर। हेटौंडाका १० राजनीतिक दलले विभिन्न सामाजिक, आर्थिक, राजनीतिक तथा जनजीविकासम्बन्धी विषय उठाउँदै संयुक्त दवाबमूलक ध्यानाकर्षण पत्र आइतबार जिल्ला प्रशासन कार्यालय मकवानपुरमा बुझाएका छन्। जिल्ला प्रशासन कार्यालयका प्रमुख जिल्ला अधिकारी (सीडीओ) बसन्त अधिकारीलाई एकीकृत रूपमा भेटेर उनीहरूले ध्यानाकर्षण पत्र हस्तान्तरण गरेका हुन्।
दलहरूले महेन्द्र राजमार्ग तथा त्रिभुवन राजपथको मध्यरेखादेखि दायाँ–बायाँ २५/२५ गज सडक विस्तारका लागि पहिल्यैदेखि अघि बढाइएको प्रक्रिया अझै पनि कार्यान्वयनको चरणमा प्रवेश गराउन ढिलाइ भइरहेको भन्दै चाँडोभन्दा चाँडो कार्यान्वयनको माग गरेका छन्। विगतमा जस्तै यो पहल सूचना र घोषणा मात्रमा सीमित नहोस् भन्ने अपेक्षा राख्दै उनीहरूले तत्काल सडक विस्तार अभियानलाई परिणाममुखी बनाइदिन प्रशासनसँग माग गरेका छन्।
ध्यानाकर्षण पत्रमा सडक सिमाभित्र पर्ने संरचना र जग्गाको वास्तविक पीडितलाई उचित क्षतिपूर्ति (मुआब्जा) उपलब्ध गराउनुपर्ने, जिल्लाभित्रका सार्वजनिक जमिनको सिमाङ्कन गरी संरक्षण गर्नुपर्ने, अवैध उत्खनन नियन्त्रण गर्नुपर्ने, वास्तविक सुकुम्बासीको पहिचान गरी व्यवस्थापन गर्नुपर्ने लगायतका मुद्दा उठाइएका छन्।
त्यसैगरी, मापदण्डविपरीत भइरहेको गिट्टी–बालुवा उत्खनन रोक्न, लागुऔषधको ओसारपसार तथा बिक्री वितरणमा कडाइ गर्न, जिल्लाभित्रका अन्य शाखा सडक तथा पुल–मार्गका कार्य छरितो रूपमा सम्पन्न गर्न, तथा निर्धारण गरिएका सडक खण्डहरूको डिपिआरसहित कालोपत्रे कार्य तत्काल सुरु गर्नुपर्ने मागहरू पनि पत्रमा समावेश छन्।
नेपाल कम्युनिस्ट पार्टी (माओवादी) मकवानपुर – सेक्रेटरी पेमा सी, क्रान्तिकारी कम्युनिस्ट पार्टी मकवानपुर – सेक्रेटरी सद्दाम हुसेन, नेपाली कांग्रेस मकवानपुर – प्रतिनिधि प्रेम तितुङ, नेकपा क्रान्तिकारी केन्द्र मकवानपुर – संयोजक विक्रम मगर,नेकपा माले मकवानपुर – सह–सचिव हरिकृष्ण अधिकारी,नेपाल कम्युनिस्ट पार्टी मकवानपुर – अध्यक्ष/संयोजक माननाथ तिमिल्सिना,उज्यालो नेपाल पार्टी मकवानपुर – प्रतिनिधि विकास वाइबा, श्रम संस्कृति मकवानपुर – इन्चार्ज/अध्यक्ष सुन्दर कुमार बज्यु, जनता समाजवादी पार्टी (जसपा) मकवानपुर – अध्यक्ष उत्तम गोम्जार राष्ट्रिय जनमोर्चा मकवानपुर – संयोजक ओबिन्द्र बहादुर लुइटेलको संयुक्त टोलिले ध्यानाकर्षण बुझाएको थियो।
संयुक्त टोलीले सोही ध्यानाकर्षण पत्र सडक डिभिजन कार्यालय तथा हेटौंडा उपमहानगरपालिकालाई पनि बुझाएको छ।
