भारतमा काम लगाइदिन्छु भनी ठगी गरेको आरोपमा युवक पक्राउ

हेटौंडा- भारतमा काम लगाइदिन्छु भनी ३ लाख ९६ हजार २८९ ठगी गरेको आरोपमा प्रहरीले एक जनालाई पक्राउ गरेको छ ।

पक्राउ पर्नेमा बझाङ छविसपाथीभेरा गांउपालिका ४ बस्ने २५ वर्षीय सन्तोष थापा रहेको जिल्ला प्रहरी कार्यालय मकवानपुरले जनाएको छ।

प्रहरीको अनुसार विभिन्न मितिमा देश भारतमा राम्रो आम्दानी हुने काम लगाई दिन्छु भनि मकवानपुर बकैया गाउँपालिका ५ बस्ने २६ वर्षीय सुरेश थिङसँग २ लाख ४ हजार २ सय ८९ र जिल्ला चितवन राप्ती नगरपालिका ४ भण्डारा बस्ने २९ वर्षीय रोशन घिमिरेसँग १ लाख ९२ हजार गरी जम्मा ३ लाख ९६ हजार, २ सय ८९ रकम ठगी गरेका थिए।

देश भारतको मुजफ्फरपुरमा लगि भने बमोजिमको काममा नलगाई भागि हिडेको र खोजतलासको क्रममा वैशाख ११ गते हेटौंडा १० स्थित बसपार्कबाट पक्राउ गरिएको प्रहरीले जनाएको छ।

थापालाई मकवानपुर जिल्ला अदालत हेटौडाबाट सोहि मितिबाट लागु हुनेगरि ८ दिनको म्याद अनुमति लिई थप अनुसन्धान भईरहेको छ।