हेटौंडा– बागमती प्रदेशको राजधानी हेटौंडाको जनघनत्व बढ्दो अवस्थामा छ । सवारी साधनको चाप पनि उत्तिकै बढ्दो छ । बढ्दो सवारी चाप र शहरीकरणका कारण दूर्घटना, चोरी, लुटपाट र विभिन्न अपराधका घटना बढ्ने चुनौती पनि उत्तिकै हुन्छ । त्यस्तो घटना हुँदा खोजबिन गरी सत्यतथ्य पत्ता लगाउनको लागि सार्वजनिक ठाउँमा राखिएका सीसी क्यामेरा निकै प्रभावकारी हुन्छन् । तर, हेटौंडामा प्रयाप्त मात्रामा सीसी क्यामेरा नहुँदा शान्ति सुरक्षामा चुनौती बढिरहेको छ ।
हेटौंडाको मुख्य सडक चोक र राजमार्गहरुमा प्रयाप्त सीसी क्यामेरा नहुँदा र भएका सीसी क्यामेरा पनि बिग्रिएका कारण प्रयाप्त शान्ति सुरक्षामा चु्नौती हुने चिन्ता रहेको जिल्ला प्रहरी कार्यालय मकवानपुरका प्रमुख प्रहरी उपरीक्षक विश्वराज खड्काको भनाइ छ । खड्काका अनुसार मकवानपुर जिल्लाभर सार्वजनिक स्थलमा एक सय ५९ वटा सीसी क्यामेरा रहेकोमा त्यसमध्ये ७९ थान सीसी क्यामेरा बिग्रिएर बसेका छन् ।
हाल ८० वटा क्यामेरा मात्रै चालु हालतमा छन् । शान्ति सुरक्षालाई थप मजबुत बनाउनको लागि राजमार्ग क्षेत्र र बजार क्षेत्रहरुमा अझै २९ ठाउँमा एएनपिआर सीसी क्यामेरा जडान गरिनुपर्ने प्रहरी उपरीक्षक खड्का बताउँछन् । प्रदेश मन्त्रालय र हेटौंडा उपमहानगरपालिकाबाट सीसी क्यामेरा मर्मत र नयाँ जडानको काम गर्ने प्रतिवद्धता भने आएको तर, काम अघि बढ्न नसकेको प्रहरी उपरीक्षक खड्का बताउँछन् । अपराध अनुसन्धान र दूर्घटनाको निष्पक्ष छानविन गर्न र समग्र शान्ति सुरक्षालाई चुस्त दुरुस्त राख्न सीसी क्यामेरा अत्यन्तै आवश्यक रहेको उनको भनाइ छ ।
