हेटौंडा महोत्सवमा आज प्रमोद खरेलले मनोरञ्जन गराउने

हेटौंडा– हेटौंडामा जारी बृहत खेलकुद तथा व्यापार महोत्सवमा आज सोमबार नेपालका चर्चित गायक प्रमोद खरेललगायतका कलाकारहरुको प्रस्तुति रहने भएको छ । आज महोत्सवमा गायक प्रमोद खरेलले आफ्ना गीतहरु प्रस्तुत गर्नेछन् भने जादुगर बलराम सरकारले आफ्नो प्रस्तुति दिनेछन् भने गायक असिमकुमार कटुवाल र सहिमा श्रेष्ठले पनि आफ्ना गीतहरु प्रस्तुत गरेर दर्शकलाई मनोरञ्जन दिलाउने आयोजकले जनाएको छ ।

महोत्सवमा आइतबार चर्चित लोक गायक गायिका रमेश प्रसाईं र कल्पना दाहालको प्रस्तुतिमा मकवानपुरका दर्शकले मनोरञ्जन लिएका थिए । दोहारीसँगै चर्चित गायिका अस्मिता अधिकारीले समेत आफ्ना लोकप्रिय गीतहरु गाएकी थिइन् । उनको गीत लोली मिलाउँदै दर्शकले नाच्दै र गाउँदै गरेका थिए । यस्तै जादुगर बलराम सरकारको जादुले समेत सबैको ध्यान खिचेको थियो । महोत्सवमा दिनप्रतिदिन दर्शकको उपस्थिति बढ्दो क्रममा रहेको छ । महोत्सवमा खेलकुदका प्रतियोगिताहरु पनि सञ्चालन भइरहेको छ ।

१७ गतेसम्म सञ्चालन हुनेमा महोत्सवमा राष्ट्रिय, प्रदेश तथा जिल्लास्तरीय गरी १३ वटा विधामा खेल हुनेछ । महोत्सव आयोजक समितिका संयोजक समेत रहेका मकवानपुर जिल्ला खेलकुद विकास समितिका अध्यक्ष भेष खड्कीले खेलकुद क्षेत्रको विकासका लागि आयोजित महोत्सवमा उपस्थित हुनका लागि जिल्लाबासीहरुलाई अनुरोध गरेका छन् । महोत्सवमा करिब २६० वटा विभिन्न स्टल रहेको छ । महोत्सवमा कृषि, पर्यटन, हस्तकला, अटोमोबाइलका साथै बाल उद्यान रहेको छ । महोत्सवबाट खेलकुद विकास समितिलाई प्राप्त हुने रकमबाट वर्षभर खेलकुद प्रतियोगिता आयोजना गर्ने आयोजकले लक्ष्य राखेको छ । महोत्सवबाट मकवानपुर जिल्ला खेलकुद विकास समितिले करिब २५ लाख रुपैयाँ प्राप्त गर्नेछ ।