राक्सिराङबासीलाई सबै सेवा घरदैलोमै

हेटौंडा–सबै किसिमका सेवाको पहुँच वृद्धि गर्दै सरल र सहज सेवा दिने उद्देश्यका साथ मकवानपुरको विकट राक्सिराङ गाउँपालिकाले गाउँटोलमै पुगी एकीकृत सेवा प्रदान गर्न सुरु गरेको छ । गाउँपालिकाले घरघरमै पुगी बिरामी जाँच, स्वस्थ्य, कृषि तथा अन्य सेवा सुरु गरेपछि गाउँबासी दंग बनेका छन् ।

‘सेवा लिने सबैको अधिकार, घरघरमा स्थानीय सरकार’ भन्ने नाराका साथ गत आर्थिक वर्षदेखि सुरु गरेको गाउँपालिकाले गाउँटोलमै पुगी एकीकृत सेवा दिने कार्यक्रमलाई निरन्तरता दिएको हो । कार्यक्रमको निरन्तरताको क्रममा गाउँपालिकाले सोमबारबाट विभिन्न वडालाई समेटेर एकीकृत सेवा सुरु गरेको हो । गाउँपालिकाको १, २ र ३ नम्बर वडालाई समेटेर सोमबार राक्सिराङ–२ को कुँडुलेमा एकीकृत घुम्ती शिविरको आयोजना गरिएको हो । शिविरमा सहकारी जागरण कार्यक्रमअन्तर्गत सहकारी सेवा पहुँच र उपभोग प्रवद्र्धन कार्यक्रम, कृषि विकास कार्यक्रमअन्तर्गत मिनी ट्रिलर, कम्वाइन मिल, टनेल प्लाष्टिकलगायत सामाग्री वितरण, पशु सेवा कार्यक्रमअन्तर्गत पशु औषधि तथा घाँसको बिउ वितरण कार्यक्रम, सामान्य स्वास्थ्य परीक्षण, निशुल्क औषधि वितरण र अपाङ्गता जाँच र परिचयपत्र वितरण कार्यक्रम गरिएको थियो ।

ज्येष्ठ नागरिक तथा अशक्त तथा हिँड्न नसक्ने बिरामीहरुको घरघरमै पुगी स्वास्थ्य जाँच र निःशुल्क औषधिकोसमेत व्यवस्था गरिएको गाउँपालिकाका अध्यक्ष राजकुमार मल्लले बताए । अर्कोवर्षदेखि एकीकृत सेवा प्रदान कार्यक्रमलाई प्रत्येक वडामा पु¥याइने र अझ व्यवस्थित तरिकाले सेवा प्रदान गर्ने लक्ष्य रहेको गाउँपालिका अध्यक्ष मल्लले जानकारी दिए । एकीकृत शिविर अन्तर्गत वैशाख १४ गते राक्सिराङ ६ को काँकडा स्वास्थ्य चौकी र श्री जुरेथुम प्राविमा कार्यक्रम निर्धारण गरिएको छ भने वैशाख १८ गते राक्सिराङ –४ को वडा कार्यालय र स्वास्थ्य संस्थाबाट सेवा दिइनेछ । त्यसैगरी वैशाख २१ गते राक्सिराङ–९ को कालिका मावि, अठारेलाई केन्द्र बनाई एकीकृत शिविर गर्ने कार्यक्रम तय भएको गाउँपालिकाका प्रमुख प्रशासकीय अधिकृत देवचन्द्र गर्तौलाले जानकारी दिए ।

एकीकृत घुम्ती शिविर उद्घाटन कार्यक्रममा बोल्दै गाउँपालिकाका अध्यक्ष राजकुमार मल्लले विकट गाउँका बासिन्दालाई घरटोलमै सेवा दिई जनमुखी काममा आफूहरु क्रियाशील रहेको बताए । एकीकृत शिविरमा ३ सय ११ जनाको सामान्य उपचार गरिएको थियो भने २२ जना गम्भीर बिरामीलाई विशेष उपचार गरिएको थियो । त्यस्तै ३ सय ६ जनालाई निशुल्क औषधि वितरण गरिएको स्वास्थ्य शाखाले बताएको छ । त्यस्तै कृषितर्फ २९० जनालाई तरकारीको बिउ वितरण गरिएको थियो । त्यस्तै पशु सेवातफ २३० जनालाई घाँसको बिउ वितरण गरिएको थियो भने २५१ जना किसानलाई पशुपंक्षीका विभिन्न रोगविरुद्धका औषधि निशुल्क वितरण गरिएको थियो । शिविरमा ११ जनाको अपाङ्गता परीक्षणको लागि निवेदन संकलन गरिएको थियो भने ३ जना अपाङ्गलाई ह्वीलचियर र वैशाखी जस्ता सहायक सामाग्री वितरण गरिएको गाउँपालिकाले जनाएको छ । १० जना ज्येष्ठ नागरिकलाई घरघरमै पुगी फलफूल, पौष्टिक आहारसहित सम्मानसमेत गरिएको थियो ।

कार्यक्रममा राक्सिराङ गाउँपालिकाका अध्यक्ष राजकुमार मल्ल, उपाध्यक्ष वनस्तम थिङ, प्रमुख प्रशासकीय अधिकृत देवचन्द्र गर्तौला, १ नम्बर वडाध्यक्ष बाबिराम मुक्तान, २ नम्बर वडाध्यक्ष वुद्धराम मुक्तान, ३ नम्बर वडाध्यक्ष उत्तम वाइबालगायतको सहभागिता रहेको थियो ।