हेटौंडा – बागमती प्रदेशका युवा तथा खेलकुदमन्त्री मीनकृष्ण महर्जनले हेटौंडा–६ मा रहेको गौरीटार रंगशालास्थित खेलकुद पूर्वाधार निर्माणको काम निर्धारित समयभित्रै सम्पन्न गर्न सम्बन्धित कार्यालय र निर्माण व्यवसायी कम्पनीलाई निर्देशन दिएका छन् ।
मन्त्री महर्जनले सम्बन्धित कार्यालयका प्रमुख, निर्माण व्यवसायी कम्पनीका प्राविधिक लगायतको टोलीसँगै आज रंगशालाको स्थलगत अवलोकन गरी निर्माण कार्य चाँडै सम्पन्न गर्न र मर्मत सम्हारतर्फ पनि ध्यान दिन निर्देशन दिएका हुन् ।
खेलकुद पूर्वाधार समयमै नबन्दा खेलकुदसँग सम्बन्धित गतिविधि अगाडि बढाउन कठिनाई भएको भन्दै यथासक्य चाँडो निर्माण सम्पन्न गर्नुपर्नेमा उनले जोड दिए ।
वर्षौैँ अघि सुरु भएतापनि हालसम्म निर्माणको कामले पूर्णता नपाउँदा निर्माणाधिन संरचनामा समेत टुटफुट तथा अन्य समस्या देखिएको छ । प्याराफिटमा राखिएका कुर्सीहरु भाँचिएका छन् भने ढोकाहरु कुहिने अवस्थामा पुगिसकेको छ ।
स्थलगत अवलोकनका क्रममा सामाजिक विकास कार्यालय हेटौंडाका प्रमुख गोपाल कँडेलले फुटबल प्याराफिट निर्माणको कार्य करिब ९५ प्रतिशत सम्पन्न भइसकेको जानकारी दिँदै अब निर्माण कार्यमा तीब्रता दिइने बताए ।
तत्कालिन अवस्थामा सामाजिक विकास मन्त्रालय मातहतको सामाजिक विकास कार्यालयमार्फत् पूर्वाधार निर्माणको काम सुरु भएको थियो । प्रदेशमा युवा तथा खेलकुद मन्त्रालय स्थापनापूर्व प्रदेश खेलकुद विकास परिषद् सामाजिक विकास मन्त्रालय मातहत थियो ।
गौरीटारस्थित फूटबल मैदान काठमाडौंको त्रिपुरेश्वरस्थित दशरथ रंगशालापछि दोस्रो ठूलो मैदान हो । मैदान र प्याराफिट निर्माणको कार्य गत आर्थिक वर्षभित्रै सम्पन्न गर्ने लक्ष्य राखिएको भएतापनि केही ढिलो हुन गएको र अब चाँडै सम्पन्न गरिने कार्यालय प्रमुख कंडेलले बताए ।
फुटबल रंगशालामा ४ हजार ५०० दर्शक क्षमताको प्याराफिट निर्माणको काम अन्तिम चरणमा पुगेको छ । रातको समयमा समेत फुटबल प्रतियोगिता सञ्चालन गर्न मिल्ने गरी काम भइरहेको उनको भनाइ छ । फुटबल रंगशाला निर्माण सम्पन्न गर्न करिब ३० करोड रुपैयाँ लाग्ने अनुमान छ ।
अवलोकनका क्रममा प्रदेश खेलकुद विकास परिषद्का प्रमुख बद्री पाठक, प्रदेश युवा परिषद्का कार्यकारी उपाध्यक्ष सन्तोष चौँलागाईँ, मन्त्रालयका इन्जिनियर निमेश बर्तौलालगायत सरोकारवालाहरुको उपस्थिति थियो ।
२३ बिघा क्षेत्रफलमा रहेको रंगशाला निर्माणमा करिब ५ अर्ब रुपैयाँ लाग्ने अनुमान छ । यसमा फूटबल मैदानसँगै पौडी पौखरी, क्रिकेट, एथलेटिक्सका लागि पूर्वाधार, फिटनेस सेन्ट्रर लगायत २१ वटा खेल संरचना निर्माण भइरहेका छन् ।
रंगशालाभित्र खेलाडीका लागि छुट्टै कोठाहरू, आवासगृह, शौचालय, मिडिया सेन्टरका लागि विशेष कक्ष, प्रतियोगिता सञ्चालनको क्रममा हुन सक्ने सम्भावित दुर्घटना र खेलाडीलाई लाग्न सक्ने चोटपटकको उपचारका निम्ति चिकित्सक बस्ने छुट्टै कक्ष लगायत थुप्रै पूर्वाधार बन्ने जनाइएको छ ।
