हेटौंडा- हेटौंडा-५ स्थित पिप्ले-क्याम्पा रंगशालामा जारी राष्ट्रिय भेट्रान्स फुटबल प्रतियोगिताको फाइनल भोलि हुने भएको छ । तेस्रो रोटरी मकवानपुर पिप्ले-क्याम्पा राष्ट्रिय भेट्रान्स फुटबल प्रतियोगिता-२०८१ को फाइनल भोलि हुने आयोजकले जानकारी दिएको हो ।
तेस्रो रोटरी मकवानपुर पिप्ले-क्याम्पा राष्ट्रिय भेट्रान्स फुटबल प्रतियोगिता २४ गतेबाट सुरु भएको थियो । पूर्वेली भेट्रान्स, झापा र फ्रिडम फाइटर भेट्रान्स काठमाडौबीच फाइनल खेल मंगलबार दिउँसो ३ बजे हुने खेल संयोजक मोहन ढकालले जानकारी दिएका छन् । प्रतियोगितामा देशका विभिन्न स्थानका १५ वटा भेट्रान्स क्लबले प्रतिस्पर्धा गरेका छन् ।
जलन प्राथमिक उपचार केन्द्र स्थापनाका लागि सहयोग जुटाउने उद्धेश्यले जारी प्रतियोगिताको उपाधि विजेताले २ लाख २ हजार २ सय २२ रुपिया“ प्राप्त गर्नेछ भने उपविजेताले १ लाख १ हजार १ सय ११ प्राप्त गर्नेछ । प्रतियोगिता सञ्चालनका लागि १६ लाख लाग्ने आयोजकको अनुमान छ । पिप्ले युवा क्लब र रोटर्याक्ट क्लब अफ मकवानपुरको सहआयोजनामा प्रतियोगिता गरिएको हो ।
