हेटौंडा– मकवानपुरको बकैया गाउँपालिका–५ स्थित तिनतले घुम्तीबाट यात्रुबहाक बस खोल्सामा खसी दूर्घटना हुँदा २२ जना यात्रु घाइते भएका छन् । हेटौंडाबाट छतिवनतर्फ जाँदै गरको बा ५ ख ६६५३ नम्बरको बस धरान चतरा सडक खण्डस्थित तिनतले घुम्तीमा आफैँ अनियन्त्रित भई करिब ५० मिटर तल खोल्सामा खसेको हो ।
आज बिहान पौने ११ बजेतिर भएको दूर्घटनामा उद्दारको काम सकिएको जिल्ला प्रहरी कार्यालय मकवानपुरले जानकारी दिएको छ । दूर्घटनालगतै २२ जना घाईतेहरुलाई स्थानीय र प्रहरीले उद्दार गरी उपचारको लागि हेटौंडा ल्याइएको छ । बस चालक हेटौंडा १२ पदमपोखरी बस्ने वर्ष ४५ को टिकाराम लामालाई प्रहरीले नियन्त्रणमा लिएको छ । बसमा ३७ यात्रु सवार रहेको चालकको भनाइ उदृत गर्दै प्रहरीले जनाएको छ । हाल घाइतेहरुको पहिचान गर्ने क्रममा रहेको जिल्ला प्रहरी कार्यालय मकवानपुरका प्रवक्ता प्रहरी नायब उपरीक्षक श्यामु अर्यालले जानकारी दिए ।
