हेटौंडा–हरेक वर्ष पुस १६ गते मनाउँदै आइएको राष्ट्रिय एकता तथा मेलमिलाप दिवस नेपाली कांग्रेस मकवानपुरले विशेष कार्यक्रम गरी मनाउने भएको छ । पुस १६ गते हेटौंडामा कांग्रेसले केन्द्रीय पदाधिकारीहरुकोसमेत उपस्थितिमा शुभकामना आदानप्रदान तथा सम्मान कार्यक्रमको आयोजना गर्ने भएको छ ।
महामन्त्री गगन थापाको प्रमुख उपस्थितिमा कांग्रेसले शुभकामना आदानप्रदान तथा पार्टीका अग्रजलाई सम्मान गर्ने कार्यक्रम राखिएको नेपाली कांग्रेस मकवानपु्रका सभापति वुद्ध लामाले सोमबार पत्रकार सम्मेलनमार्फत जानकारी दिए । उक्त दिन पार्टीका पूर्व सभापतिहरु, पार्टीमा लामो समय योगदान गरेका अग्रजलगायत गरी करिब ३० जनालाई सम्मान गर्ने योजना बनाइएको लामाले बताए । हेटौंडाको रोयल पार्टी प्यालेसमा हुने विशेष कार्यक्रममा महामन्त्री थापासहित सहमहामन्त्री महालक्ष्मी उपाध्याय डीना, बागमती प्रदेश सभापति ईन्द्र्रबहादुर बानियाँलगायतको सहभागिता रहने जनाइएको छ ।
पार्टीका संस्थापक नेता बीपी कोइराला, गणेशमान सिंहलगायतका नेताहरु लामो निर्वासन अन्त्य गरी भारतबाट स्वदेश फर्किएको दिन पुस १६ गतेलाई कांग्रेसले हरेक वर्ष ‘राष्ट्रिय एकता तथा मेलमिलाप दिवस’का रुपमा मनाउने गरेको छ । २०१७ साल पुस १ गते तत्कालीन राजा महेन्द्रले ‘कू’ गर्दै शासन आफ्नो हातमा लिएका थिए । कांग्रेस संस्थापक एवम् तत्कालीन प्रधानमन्त्री वीपी कोइरालालगायतलाई जेल हालिएको थियो । महेन्द्रले बहुदलीय प्रजातान्त्रिक व्यवस्था विघटन गरी राजनीतिक दलमाथि प्रतिबन्धमात्र लगाएनन् नेताहरुमाथि देशद्रोहको मुद्दासमेत लगाए ।
तर, २०२५ कात्तिक १४ गते वीपी कोइरालालगायतका नेताहरु जेलमुक्त भए । त्यसपछि उनीहरु भारतमा निर्वासन जीवन बिताउन थाले । त्यसको ८ वर्षपछि अर्थात् २०३३ साल पुस १६ गते वीपी कोइराला, गणेशमान सिंह, शैलजा आचार्य, खुमबहादुर खड्कालगायतका नेताहरु आफूहरुमाथि लगाइएको मृत्युदण्डको मुद्दाको बेवास्ता गर्दै राष्ट्रियता जोगाउन राजसंस्था र सबै राजनीतिक दलहरु मिलेर अघि बढ्नुपर्ने नीति अंगाल्दै स्वदेश फर्किए । सोही दिनलाई कांग्रेसले विशेष दिनका रुपमा मनाउने गरेको छ ।
