हेटौंडा–नेपाली कांग्रेसका महामन्त्री गगन थापाले नेपाली कांग्रेसले आगामी २०८४ को चुनावमा घोषणापत्र नभई परिणामपत्र बोकेर जानुपर्ने धारणा व्यक्त गरेका छन् । ४९ औँ मेलमिलाप दिवसको अवसरमा मंगलबार नेपाली कांग्रेस मकवानपुरले हेटौंडामा आयोजना गरेको कार्यक्रमलाई सम्बोधन गर्दै महामन्त्री थापाले नेपाली कांग्रेसका सबै तहका जनप्रतिनिधिले परिणाम आउनेगरी काम गर्नुपर्नेमा जोड दिए ।
‘२०७९ को निर्वाचनमा नेपाली कांग्रेसलाई पहिलो पार्टीको रुपमा जनताले जिताएर पठाए, त्यसैले अब हामीले काम गरेर जनतालाई देखाउनुपर्छ, अझै हामीलाई काम गरेर देखाउने समय ३ वर्ष बाँकी नै छ । सबै तहका जनप्रतिनिधिले यसतर्फ केन्द्रित भएर २०८४ को चुनावमा घोषणापत्र होइन परिणामपत्र लिएर जनतामाझ जानुपर्छ ।’ थापाले भने । वर्तमान सरकार टिक्दैन भनेर हल्ला चलाइएको भन्दै उनले वर्तमान सरकार अबको तीन वर्षसम्म निरन्तर रहने विश्वास दिलाए । ‘सरकारमा अझै तीन वर्ष बस्छौँ, तीन वर्षमा यो देशमा नागरिकलाई हुदैछ, हुन्छ भन्ने आशा र भरोसा दिलाउनुपर्नेछ ।’ थापाले भने ।
थापाले पार्टीको महाधिवेशन समयमै हुने दाबी पनि गरेका छन् । ‘महाधिवेशन हुन्छ कि हुँदैन भनेर रुवाबासी गर्न जरुरी छैन । प्रतिबन्धित कालमा महाधिवेशन गरेको पार्टीले अब पनि समयमै महाधिवेशन गर्दैन कि भन्ने नसोच्नुहोला,’ उनले भने । पार्टीभित्र कसैलाई महाधिवेशनका पक्षधर र कसैलाई महाधिवेशन नगर्ने बनाइएको भन्दै उनले महाधिवेशन समयमै हुनेमा ढुक्क रहन आग्रह गरे ।
कार्यक्रममा नेपाली कांग्रेसका केन्द्रीय सदस्य मोहन आचार्य, प्रतिमा गौतम, अजयबाबु शिवाकोटी बागमती प्रदेश सभापति ईन्द्रबहादुर बानियाँ, पूर्व सभापति रघुरमण न्यौपाने, कांग्रेस क्षेत्र नम्बर १ का सभापति दामोदर खनाल, क्षेत्र नम्बर २ (ख) का सभापति रन्जन कालाखेती, मनहरी गाउँपालिका सभापति प्रकाश वर्ताैलालगायतले मन्तव्य व्यक्त गरेका थिए । पार्टी सभापति बुद्ध लामाको सभाध्यक्षतामा भएको कार्यक्रमकाबीच नेपाली कांग्रेसका पूर्व सभापतिहरु, पार्टीमा लामो समय योगदान गरेका नेताहरुलगायत गरी करिब ३० जनालाई सम्मान गरिएको थियो । यस्तै कार्यक्रमकैबीच विभिन्न पार्टी परित्याग गरी करिब डेढ दर्जन युवा नेपाली कांग्रेसमा प्रवेश गरेका थिए ।
