गैरसरकारी चिकित्सा सहायता समूह–डक्टर्स विदाउट बोडर्स (एमएसएफ) ले सुडानको ह्वाइट नाइल राज्यमा हैजाबाट दुई हप्तामै कम्तीमा ९२ जनाको मृत्यु भएको जनाएको छ ।
फेब्रुअरी २० देखि मार्च ५ सम्म एमएसएफको सहयोगमा स्वास्थ्य मन्त्रालयको कोस्ती शिक्षण अस्पतालमा रहेको हैजा उपचार केन्द्रमा जम्मा २ हजार ७१८ जना बिरामी भर्ना भएका थिए ।
पानीजन्य रोग हैजाको लहर फेब्रुअरी १६ मा उम–दबाकिर पावर स्टेसनमा र्यापिड सपोर्ट फोर्सेस (आरएसएफ) को प्रक्षेपणपछि ठूलो मात्रामा बिजुली आपूर्ति बन्द भएपछि उत्पन्न भएको एमएसएफले जनाएको छ । उक्त प्रक्षेपणपछि मानिसहरु राज्य प्रणालीबाट वितरित पानीबाट बञ्चित भएको र अन्यत्र स्रोतबाट उपलब्ध पानीको प्रयोग एवं सेवन गरेका कारण हैजा फेलिएको बताइएको छ ।
गत मंगलबारसम्म सुडानी स्वास्थ्य मन्त्रालयले घोषणा गरेको जुलाई २०२४ देखि देशमा हैजाका घटनाहरूको संख्या ५७ हजार १३५ पुगेको जनाएको छ । जसमा १ हजार ५०६ जनाको मृत्यु भएको छ ।
