सुनसरीको कोशी गाउँपालिकाबाट अपहरणमा परेकी बालिकाको प्रहरीले सकुशल उद्धार गरेको छ। बुधबार अपहरणमा परेकी कोशी गाउँपालिका-७ मुसहरी टोल बस्ने कुशेश्वर सदाको ७ वर्षीया छोरी ईशु सदालाई जिल्ला प्रहरी कार्यालय सुनसरीका डीएसपी युगराज खतिवडाको नेतृत्वको प्रहरी टोलीले बिहीबार उद्धार गरेको हो।
बालिकालाई सुनसरीबाट कोशी ब्यारेजबाट सप्तरी तर्फ लैजाँदै गर्दा ५६ नम्बर ढोकाबाट उद्धार गरी अपहरणमा संलग्न व्यक्तिलाई पक्राउ गरिएको सुनसरीका प्रहरी प्रमुख एसपी सुमनकुमार तिम्सिनाले बताएका छन्।
उनले बुधबार दिउसो १;५० बजे बालिका अपहरणमा परेको खबर पाउने बित्तिकै डीएसपी योगराज खतिवडाको नेतृत्वमा नौ जना प्रहरीको टोली परिचालन गरी बालिकाको उद्धार गर्न प्रहरी सफल भएको बताए।
बालिका अपहरण गर्ने सप्तरीको कञ्चनरुप नगरपालिका-१२ स्थित धरमपुर घर भएका जितुवा भन्ने जितेन्द्र साह (हलुवाइ)लाई पक्राउ गरिएको एसपी तिम्सिनाले बताए। उनले बालिका अपहरणमा परेको खबर पाउनासाथ सबै गौडाहरूमा प्रहरी परिचालन गरि घेरा हालेर बालिकालाई उद्धार र अभियुक्तलाई पक्राउ गर्न सफल भएको बताए।
प्रहरीले अपहरणमा परेकी बालिकालाई भारततर्फ लान सक्ने भएकाले नेपाल-भारत सीमा क्षेत्रमा समेत प्रहरी परिचालन गरिएको एसपी तिम्सिनाले बताए। घर अगाडि खेलिरहेकी बालिकालाई साहले सिटि सफारीमा हालेर अपहरण गरेको सीसीटीभी फुटेजको सहायतामा बालिकालाई उद्धार गरिएको हो। अपहरणकारी साहलाई जिल्ला प्रहरी कार्यालय सुनसरीको हिरासतमा राखेर घटनाको अनुसन्धान थालिएको एसपी तिम्सिनाले बताए।
