हेटौंडा- हेटौंडा–११ स्थित मामाघर नेपाल सिटौला उप्रेती समाज सेवा राष्ट्रिय पुरस्कारबाट सम्मानित भएको छ ।
भक्तपुरमा अटिजम भएका बालबालिकाको क्षेत्रमा कार्यरत् विशेष स्कुल तथा पुनर्स्थापना केन्द्रले हरेक वर्ष प्रदान गर्दै आएको पवित्रा सिटौला उप्रेती समाज सेवा राष्ट्रिय पुरस्कारबाट मामाघर नगद पच्चीस हजारबाट सम्मानित भएको हो ।
सेवाभाव र यसको यथार्थलाई हृदयंगम गरी समाजमा सहयोगको खाचोमा रहेका सडकबालबालिकाको शिक्षा र पुनर्स्थापनामा संस्थाले चलाइरहेको ‘सडक बालबालिकामुक्त’ अभियानमा पुर्याइएको योगदानको कदर गर्दै मामाघर नेपाललाई सम्मानपत्र प्रदान गरिएको थियो ।
झापाकी समाजसेवी पवित्रा सिटौला उप्रेतीको स्मृतिमा स्थापित पुरस्कार हरेक वर्ष समाजसेवामा क्रियाशील संस्थालाई प्रदान गरिदै आएको छ । कार्यक्रममा मामाघर नेपाल सञ्चालक डा. अर्पण पराजुलीलाई सम्मान हस्तान्तरण गरिएको थियो ।
पराजुली लामो समयदेखि निरन्तर सडकमानव क्षेत्रमा सेवा गर्दै आएका छन् ।
