कैलाश– मकवानपुरको विकट कैलाश गाउँपालिकाले बाल बिवाह न्युनीरकणका लागि बिगतका वर्षदेखि नै सुरु गरेको चेली प्रोत्साहन कार्यक्रमलाई निरन्तरता दिने क्रममा १६ औँ अधिवेशनकाबीच ७ जना चेलीलाई नगदसहित सम्मान गरेको छ । कम्तिमा दस जोड दुई पास गरी २० वर्ष उमेर पार भएपछि मात्र बिवाह गर्ने चेलीलाई गाउँपालिकाले प्रतिव्यक्ति २० हजार रुपैयाँ नगदसहित सम्मान गरेको हो ।
मंगलबार गाउँपालिकाको १६ औँ अधिवेशनका अवसरमा ७ जनालाई सम्मान गरिएको छ । सम्मानित हुनेहरुमा कैलाश–६ की पार्वती सुवेदी, ५ नम्बर वडाकी कमला श्रेष्ठ, १० नम्बर वडाकी एलिना मोक्तान, सविना मोक्तान, सर्मिला मोक्तान, ९ नम्बर वडाकी सानुमाया स्याङ्तान र राधिका तितुङ रहेका छन् । गाउँपालिकाका अध्यक्ष लोकबहादुर मुक्तान उपाध्यक्ष बालकुमार मल्ललगायतले उनीहरुलाई नगदसहित सम्मान गरेका हुन् ।
बिहे गर्नको लागि कम्तिमा पनि १० जोड २ पास गर्नुपर्छ र २० बर्ष पूरा हुनुपर्छ भन्ने सन्देश दिनका लागि प्रोत्साहन गर्न बजेटमा कार्यक्रमको व्यवस्था गरिएको गाउँपालिका अध्यक्ष मोक्तानले बताए । गाउँपालिकाले हरेक वर्ष चेली प्रोत्साहन कार्यक्रमका लागि बजेट विनियोजन गर्दै आएको छ । गाउँपालिकाले हरेक वर्ष हिउँदे र बर्खे गाउँसभाका बीच तोकिएको शिक्षा र उमेर पूरा गर्ने चेलीलाई नगदसहित सम्मान गर्ने गरेको छ । गत माघमा भएको १५ औँ अधिवेशनमा पनि ७ जनालाई सम्मान गरिएको थियो । गाउँपालिकाले ३ वर्षको अवधिमा ३५ जना चेलीलाई नगदसहित प्रोत्साहन प्रदान गरिसकेको जनाएको छ ।
