हेटौँडा–हेटौँडा–१९ बस्तीपुरमा रहेको निर्मल बहुमुखी क्याम्पसले निर्मल माध्यमिक विद्यालयबाट १२ कक्षा उत्र्तीर्ण गरेका विद्यार्थीलाई बधाई तथा स्नातक कक्षामा स्वागत कार्यक्रमको आयोजना गरेको छ । मंगलबार एक कार्यक्रमकाबीच क्याम्पसले विद्यार्थीलाई बधाई ज्ञापन गर्दै स्नातक तह अध्ययनको लागि स्वागत गरेको हो ।
क्याम्पस सञ्चालक समितिका अध्यक्ष राजकुमार भेटवालको अध्यक्षतामा भएको कार्यक्रममा हेटौँडा–१९ का वडाध्यक्ष नरनाथ सुवेदीको प्रमुख आतिथ्यता रहेको थियो । निर्मल माविबाट २०८२ मा नियमित २६६ जनाले परीक्षा दिएकोमा १३५ जना र आंशिक तर्फ ५० जना गरी १८५ जना विद्यार्थी उत्तीर्ण भएका थिए ।
कार्यक्रममा विद्यार्थीलाई बधाई तथा स्वागत ज्ञापन गर्दै वडाध्यक्ष सुवेदीले स्नातक तहमा नियमित कक्षामा उपस्थित हुने विद्यार्थीलाई वडाको तर्फबाट छात्रवृत्ति प्रदान गर्ने घोषणा गरे । कार्यक्रमकैबीच मनहरी १ का वडाध्यक्ष शिवप्रसाद खनाललेसमेत स्नातक तहमा भर्ना गरेका छन् । उनले आफ्नो गाउँघरकै क्याम्पसबाट उच्च शिक्षा अध्ययन गर्नुपर्ने अन्य विद्यार्थीलाई सुझाव दिए ।
क्याम्पस प्रमुख सुवासचन्द्र कँडेलले क्याम्पसले गरेका कार्यहरुका साथै आगामी योजनाबारे जानकारी गराएका थिए । कार्यक्रममा निर्मल माविका प्रधानाध्यापक प्रबोध विडारी, सल्लाहकार हरिवंश भेटवाल, रामचन्द्र वर्तौला, प्रध्यापक संघका सभापति गोपिरमण प्याकुरेल, स्ववियु सभापति प्रशान्त भण्डारीलगायतले मन्तव्य व्यक्त गरेका थिए ।
