हेटौंडा — कमाने क्रिकेट क्लबद्वारा आयोजित तेस्रो संस्करणको कमाने प्रिमियर लिग (केपीएल) क्रिकेट प्रतियोगिताको आय–व्यय विवरण सार्वजनिक गरिएको छ। गत माघ १६ देखि १९ गतेसम्म सञ्चालन भएको प्रतियोगिताको विवरण करिब सात महिनापछि सार्वजनिक गरिएको हो।
क्लबका अध्यक्ष किशोर खत्रीका अनुसार प्रतियोगिताको खर्च र आम्दानीबारे विस्तृत विवरण तयारीमा केही ढिलाइ हुनुका साथै दर्ता शुल्क र अन्य प्राप्त गर्नुपर्ने रकम समयमै नउठेका कारण विवरण सार्वजनिक गर्न ढिलाइ भएको हो। उनका अनुसार दोस्रो संस्करणको विवरण पनि यसै वर्ष सार्वजनिक गरिएको छ।
सार्वजनिक विवरण अनुसार, तेस्रो संस्करणबाट क्लबले ३ लाख ९३ हजार २ सय ५० रुपैयाँ आम्दानी गरेको थियो भने ३ लाख ९२ हजार २ सय ९५ रुपैयाँ खर्च भएको देखिएको छ। क्लबका अनुसार अझै ७० हजार रुपैयाँ उठ्न बाँकी रहेको छ। बाँकी रकम प्राप्त भएमा क्लबको खातामा ९५५ रुपैयाँ बचत हुने अध्यक्ष खत्रीले जानकारी दिए।
हेटौंडा उपमहानगरपालिका–८ नम्बर वडा कार्यालयको सहयोगमा सम्पन्न प्रतियोगितामा ८ वटा टिम सहभागी भएका थिए। माघ १९ गते सम्पन्न प्रतियोगिताको उपाधि कमाने टाइगर्सले कमाने रोयल्सलाई ४ रनले पराजित गर्दै जितेको थियो।
प्रतियोगिताको विजेता टोलीले ५० हजार रुपैयाँ, ट्रफी, मेडल र प्रमाणपत्र प्राप्त गर्यो भने उपविजेता टोलीले २५ हजार रुपैयाँ, शिल्ड र प्रमाणपत्र प्राप्त गरेका थिए। प्रतियोगिताका लागि प्रथम पुरस्कारको प्रायोजन जनकपुर बोल्डसका मालिक उत्सव सिग्देलले गरेका थिए।
कमाने क्रिकेट क्लबले विगत ३ वर्षदेखि लगातार ‘कमाने प्रिमियर लिग’ आयोजना गर्दै आइरहेको छ, जसले स्थानीयस्तरमा खेलकुदको प्रवर्द्धन र युवा प्रतिभालाई अगाडि ल्याउन महत्वपूर्ण योगदान दिँदै आएको छ।
