मकवानपुर । मकवानपुर प्रहरीले ठूलो परिमाणको लागुऔषध ट्रामाडोलसहित पाँच जनालाई पक्राउ गरेको छ।
जिल्ला प्रहरी कार्यालय मकवानपुरका अनुसार बुधबार बिहान करिब १० बजे हेटौंडा उपमहानगरपालिका–५, सानोपोखरामा लागुऔषध कारोबार भइरहेको भन्ने सूचनाका आधारमा प्रहरी टोली खटिएको थियो।
खोजतलासीका क्रममा खाली जग्गामा लुकाइ–छिपाइ राखिएको ८३,००० पिस ट्रामाडोल क्याप्सुल बरामद गरिएको प्रहरीले जनाएको छ। साथै, उक्त लागुऔषध बिक्री वितरण गर्न प्रयोग गरिएको ना.३२ प ३२४४ र बा.प्रदेश ००५ प १८५ नम्बरका दुईवटा मोटरसाइकल समेत प्रहरीले नियन्त्रणमा लिएको छ।
पक्राउ पर्नेमाहेटौंडा–१५ बस्ने, बकैया–१२ घर भएका १९ वर्षीय अशोक स्याङ्तान,हेटौंडा–१७ का २० वर्षीय प्रवेश बरैली,हेटौंडा–४ का २० वर्षीय निशान कोईराला,बकैया–२२ का ३५ वर्षीय राजिब लामा (बक्सर) र मकवानपुरगढी गाउँपालिका–२ का २३ वर्षीय दिपेश संजेल रहेको प्रहरीले जनाएको छ।
प्रहरीले उनीहरूलाई नियन्त्रणमा लिएर लागुऔषध सम्बन्धी कसुरमा म्याद थप अनुमति लिई थप अनुसन्धान गरिरहेको जनाएको छ।
