नेपाल राष्ट्रिय शिक्षक संगठन राष्ट्रिय समितिको निर्णय एवम् वागमती प्रदेशको सर्कुलर बमोजिम बागमती प्रदेशका १३ वटै जिल्लाका स्थानीय तहहरुमा आज शिक्षा क्षेत्रका मागहरु समेटेर तयार पारिएको ज्ञापन पत्र बुझाईएको छ ।
संगठन प्रदेशका महासचिव पूर्णबहादुर पुरीले छिटपुट बाहेक १३ जिल्लाका सबै स्थानीय तहहरुमा संगठनले ज्ञापन पत्र बुझाएको बताएका हुन् । संघीय शिक्षा ऐनको विधेयक समयमै नआउनु दुर्भाग्यपूर्ण भएको भन्दै देशकै प्रभावशाली शिक्षक नेता एवम् संगठन मकवानपुर अध्यक्ष श्रीराम दाहालले पालिकासंग भन्दा संघीय सरकारसंग आफूहरुको गुनासो रहेको बताए ।
बागमती प्रदेशको राजधानी हेटौंडा उपमहानगरपालिकाका उपमेयर राजेश बानीयाँलाई आफ्नो संगठनको तर्फबाट ज्ञापनपत्र बुझाउँदै उनले यस्तो बताएका हुन् ।नेपाल राष्ट्रिय शिक्षक संगठन राष्ट्रिय समितिको निर्णय बमोजिम आज देशभरका ७ सय ५३ वटै स्थानीय तहमा छिटपुट बाहेक ज्ञापनपत्र बुझाइएको संगठन राष्ट्रिय समिति महासचिव हंसबहादुर शाहीले बताएका छन् । ज्ञापन पत्रमा शिक्षा क्षेत्रमा बढ्दै गएको अराजकता र सुधार गर्नुपर्ने विषय उल्लेख गरिएको शाहीले बताए ।
