हेटौंडा। विश्वभर आत्महत्या एक गम्भीर सार्वजनिक स्वास्थ्यको समस्या बन्न पुगेको सन्दर्भमा मकवानपुरमा कार्यरत् नागरिक समाजका प्रतिनिधिहरुले सामाजिकसञ्जालमा आत्महत्यासम्बन्धि प्रसारण हुने भ्रामक, तथ्यहीन तथा कपोकल्पित सामग्रीमाथि निगरानी र नियमन गर्न माग गर्दै जिल्ला प्रशासन कार्यालयलाई ज्ञापनपत्र बुझाएका छन् ।
‘दैनिक २० जनाको ज्यान गइरहेको सन्दर्भमा सामाजिकसञ्जालले संवेदनशीलता देखाउनुपर्छ’ भन्ने सन्देशसहित बुझाइएको ज्ञापनपत्रमा आत्महत्यासम्बन्धि समाचार सार्वजनिक गर्दा आत्महत्या रोकथामसम्बन्धि सञ्चारकर्मीका लागि मार्गदर्शन–२०८० अनुसार कार्यान्वयन गर्नुपर्ने माग गरिएको छ । ज्ञापनपत्रमा भनिएको छ–टिकटक, फेसबुकलगायत सामाजिकसञ्जालमा प्रसारित केही तथ्यहीन, अतिरञ्जित तथा असंवेदनशील सामग्रीले आममानिसको मानसिक स्वास्थ्यमा नकारात्मक असर पार्ने र आत्महत्याको जोखिम अझ बढाउने खतरा छ । त्यसैले यस्ता सामग्रीको नियमन अपरिहार्य छ ।
ज्ञापनपत्रमार्फत् नागरिक समाजले केही विषयमा विशेष जोड दिएको छ । उसले आत्महत्या प्रोत्साहन गर्ने सामाजिकसञ्जाल सामग्रीहरुमा निगरानी र नियन्त्रण, आत्महत्यासम्बन्धि समाचार प्रकाशन/प्रसारण गर्दा राष्ट्रिय मार्गदर्शन पालना, मानसिक स्वास्थ्यसम्बन्धि आपत्कालीन हेल्पलाइन नम्बर ११६६ को व्यापक प्रचारप्रसार, साइबर ब्युरोमा दर्ता हुने उजुरीहरुप्रति तुरुन्त कार्यान्वयन र आवश्यक कदम चाल्न, स्थानीय तह र जिल्लास्तरमा आत्महत्या रोकथामका कार्यक्रम र छलफलको वातावरण सिर्जना, विश्व आत्महत्या रोकथाम दिवसका अवसरमा जनचेतनामूलक कार्यक्रम आयोजना र कार्यालय तहमा कर्मचारीका लागि मानसिक स्वास्थ्य प्रवद्र्धन कार्यक्रम सञ्चालन माग गरिएको छ । आत्महत्या रोकथामका लागि सञ्चारमाध्यमको भूमिका गम्भीर र उत्तरदायित्वपूर्ण रहनुपर्ने उनीहरुको दाबी छ ।
ज्ञापनपत्र प्रदेशका सामाजिक विकास मन्त्री कञ्चनचन्द्र वादे र मकवानपुरकी प्रमुख जिल्ला अधिकारी स्किम श्रेष्ठसमक्ष कार्यक्रम संयोजक सुनिरा लामाको नेतृत्वमा बुझाइएको थियो । नेपाल प्रहरीले सार्वजनिक गरेको पछिल्लो तथ्यांकअनुसार नेपालमा आव २०७९/०८० मा ७ हजार ५५ जनाले आत्महत्या गरेका थिए, जुन संख्या प्रतिदिन झण्डै २० जनाको दरले बढिरहेको देखिन्छ । मकवानपुरमा अघिल्लो वर्ष १ सय ३१ जनाले आत्महत्या गरेका थिए ।
