जनप्रिय माविले आफ्नो स्वर्ण महोत्सवको अवसरमा स्व मोहनचन्द्र चौलागाई स्मृति रनिङ्शिल्ड हाजिरीजवाफ प्रतियोगिता आज सम्पन्न गरेको छ । हेटौँडा १६ का अध्यक्ष एवम् उपमहानगरपालिकाका सामाजिक विकास संयोजक रामकृष्ण कोइरालाको प्रमूख आतिथ्यता रहेको कार्यक्रममा विव्यस अध्यक्ष मोहनप्रसाद वस्ताकोटीको अध्यक्षतामा सम्पन्न भएको हो ।
मोहनचन्द्र स्मृति प्रतिष्ठानको संरक्षकत्वमा नेपाल रेडक्रस सोसाइटी हटिया उपशाखा ले हेटौँडा नगरपालिका स्तरीय रनिङ्शिल्ड हाजिरीजवाफ प्रतियोगिता सम्पन्न गरेको हो । कार्यक्रममा हेटौँडा उपमहानगरभित्र रहेका १४ वटा माध्यमिक विद्यालयहरुको सहभागिता रहेको थियो । प्रतियोगितामा छनौट चरणबाट १० वटा विद्यालयहरु दोस्रो चरणका लागि प्रवेश गरेका थिए । जसमा तुलसीमेहर ईङ्गलिस बोर्डिङ्ग स्कुल प्रथम, हेटौडा एकेडेमी हेटौँडा द्वितीय र ज्योति मावि हेटौँडाले तृतीय स्थान हात पारेका हुन् ।
कार्यक्रममा नेपाल रेडक्रस सोसाइटी जिल्ला शाखा मकवानपुरका सदस्य कृष्ण बहादुर सापकोटाको विशेष आतिथ्यता रहेको थियो । त्यसैगरी रेडक्रस उपशाखा हटियाका सभापति राजकुमार वास्तोला, जनप्रिय माविका व्यवस्थापन समिति सदस्य गोविन्द दुलाल, इन्द्र प्रसाद खतिवडा, स्रोत व्यवस्थापन तथा अनुगमन समिति संयोजक कृष्णप्रसाद पनेरु, प्रधानाध्यापक भूपेन्द्र चौलागाई, सहायक प्रअ रामआशिष मण्डल निवर्तमान प्रअ नमराज अर्याल, अतिरिक्त क्रियाकलाप विभाग संयोजक युक्तलाल विश्वकर्मा एवम् तहगत संयोजकहरुको उपस्थिति रहेको थियो । कार्यक्रममा मोहनचन्द्र स्मृति प्रतिष्ठानका संरक्षक एवम् विद्यालयका पूर्व व्यवस्थापन समिति अध्यक्ष लोकनाथ चौलागाई एवम् परिवारको विशेष उपस्थिति रहेको थियो ।
कार्यक्रमलाई जनप्रिय मावि अंग्रेजी माध्यम संयोजक रविन श्रेष्ठले संयोजन गरेका थिए भने । निर्णायकहरुमा शिक्षकहरु सम्प्रस पौडेल, प्रेम घिमिरे र सुस्मिता वास्तोला रहेका थिए । कार्यक्रम जनप्रिय मावि मिडिया विभाग संयोजक सुनिल गौतमले सञ्चालन गरेका हुन् ।

जनप्रिय माविले आज नै आफ्नो स्वर्ण जयन्तीको अवसरमा अन्तर विद्यालय स्तरीय कविता प्रतियोगिता सम्पन्न गरेको छ । उत्कृष्ट पाच कवितालाई छनौट गरिएको कविता प्रतियोगितालाई साहित्य विभाग संयोजक शिक्षक अनिता तिमल्सिनाले संयोजन गरेकी हुन् । यता बालविकास केन्द्र अन्तर्गत अभिभावक मैत्री भेटघाट र खेलकुद सहित विभिन्न रचनात्मक क्रियाकलाप पनि सम्पन्न भएको छ ।
स्वर्ण जयन्ती सप्ताह अन्तर्गत मंसिर १३ गते बृहत रक्तदान कार्यक्रम र पूर्व विद्यार्थी पूनर्मिलन तथा पूनर्गठन कार्यक्रम रहेको स्वर्ण जयन्ती मूल समारोह समितिले जनाएको छ । बृहत रक्तदान कार्यक्रम बिहान ७ बजे विद्यालय प्राङ्गणमा नै सञ्चालन हुने हुनाले “रक्तदान जीवनदान” का निम्ति सबैको उपस्थिति सहितको अपेक्षा राखिएको विद्यालयका प्रधानाध्यापक भूपेन्द्र चौलागाईले बताए । स्वर्ण जयन्तिको महाअभियानमा जनप्रिय माविले विपन्न विद्यार्थी सहायताका र शैक्षिक उन्नयनका लागि जनप्रिय अक्षयकोष समेत स्थापना गरेको छ । चौलागाईले अक्षयकोषमा सबैले सक्दो सहयोग गरी त्यस क्षेत्रकै शैक्षिक विकासमा सबैलाई हातेमालो गर्न अपिल समेत गरेका छन् ।
