हेटौंडा । मकवानपुरको पूर्व पश्चिम राजमार्ग अन्तर्गत हेटौंडा–१९ नेवारपानीमा सवारी दुर्घटना हुँदा एक जनाको मृत्यु भएको छ।
मृतक सर्लाही जिल्लाको बरहथवा नगरपालिका–१५ पिपराभिट्टा घर भई हाल पर्सा जिल्लाको वीरगञ्ज महानगरपालिका–२ छपकैया बस्ने ३८ वर्षीय गोविन्द चौधरी रहेको जिल्ला प्रहरी कार्यालय मकवानपुरले जनाएको छ।
प्रहरीका अनुसार शुक्रबार बिहान करिब ६:१० बजेको समयमा हेटौडाबाट चितवनतर्फ जाँदै गरेको ना ४ ख ९९२३ नम्बरको टेलर र चितवनबाट वीरगञ्जतर्फ आउँदै गरेको बा.प्र. ०३–००१ ख ०३९८ नम्बरको खाली ट्रक एकआपसमा ठोक्किँदा दुर्घटना भएको हो।
दुर्घटनापछि टेलर चालक स्टेरिङमा च्यापिएको अवस्थामा भेटिएको थियो। इलाका प्रहरी कार्यालय नेवारपानीबाट खटिएको प्रहरी टोलीले स्थानीयको सहयोगमा चालकलाई उद्धार गरी उपचारका लागि चुरेहिल अस्पताल हेटौंडामा ल्याइएको थियो।
उक्त दुर्घटनामा गम्भीर घाइते भएका चालकलाई अस्पतालले मृत घोषणा गरेको प्रहरीले जनाएको छ।
दुर्घटनामा संलग्न ट्रक चालक चितवनको खैरहनी नगरपालिका-९ निवासी करिब ४२ वर्षीय धनेश्वर चौधरी सकुशल रहेका छन्। उनलाई प्रहरीले नियन्त्रणमा लिई इलाका प्रहरी कार्यालय नेवारपानी, मकवानपुरमा राखी आवश्यक अनुसन्धान भइरहेको जिल्ला प्रहरी कार्यालय मकवानपुरले जनाएको छ।
