हेटौँडा– सरकारी विद्यालयमा अध्यापन गराउने शिक्षक तथा सरकारी कर्मचारीले आफ्ना छोराछोरीलाई भने महङ्गो निजी विद्यालयमा पढाउने गरेको भन्दै आलोचना हुने गरेको छ । तर, मकवानपुरको हेटौँडा १६ मा रहेको जनप्रिय माध्यमिक विद्यालयमा अध्यापनरत शिक्षकहरुले भने आफ्ना सन्तान आफू अध्यापनरत विदालयमै पढाउन थालेको वर्षौँ भइसक्यो ।
त्यहाँ अध्यापनरत झण्डै १ सयको हाराहारीमा रहेका शिक्षकले आफ्ना छोराछोरीलाई कार्यरत विद्यालयमै अध्यापन गराइरहेका छन् । प्रधानाध्यापक भुपेन्द्र चौलागाईले आफू त्यस विद्यालयमा सरुवा भएर आएपछि छोरी भविष्का र छोरा भविष्यलाई नीजि विद्यालयबाट झिकेर जनप्रियमा भर्ना गरे । त्यसपछि सरु भयो कार्यरत शिक्षकका ुछोराछोरीको पनि जनप्रिय माविमै भर्ना गराउने क्रमको श्रृंखला । त्यतिले मात्रै यो क्रमको अन्त्य भएन बरु सरकारी विद्यालयमा अन्यत्र कार्यरत रहेका शिक्षकहरु समेतले जनप्रिय माविमा आफ्ना नानीबाबुलाई भर्ना गराउन सरु गरे । अहिले यो विद्यालयमा २ हजार भन्दा ज्यादा विद्यार्थीहरु अध्यापन गरिरहेको प्रधानाध्यापक चौलागाईले बताए । ु
त्यसो त यो विद्यालयमा देशका करिव ३४ जिल्लाबाट आएका विद्यार्थीहरुले अध्ययन गरेको तथ्याङ्क छ । उत्कृष्ट प्राविधिक धारको शिक्षाले यहाँ अध्ययन गरेर फर्किएकाहरु कोहिपनि बेरोजगार बस्नुनपरेको खुशी साट्छन् सीटिइभिटी कार्यक्रम संयोजक अनिल सापकोटा ।
जनप्रिय मावि अध्ययन गरेर देशकै उच्च शैक्षिक प्रशासनका क्षेत्रमा काम गरेका रामशरण सापकोटाको पनि विद्यालयप्रति उत्तिकै सद्भाव छ । उनले भने ‘यो विद्यालय मध्य नेपालकै उत्कृष्ट शैक्षिक गन्तव्यमध्ये एक हो ।’ त्यसो त जनप्रियको प्राविधिक धार अध्ययन गरेर सफल व्यवसायी बनेका फेन्चु लामाको अहिले आफ्नै कृषि फारम छ । ४ करोड लगानीमा यो नमुना कृषि फारम खोल्ने साहस जनप्रिय माविकै प्राविधिक शिक्षाले दिलाएको उनको पनि तर्क छ ।
जनप्रिय माविले पढ्दै कमाउँदै कार्यक्रम सञ्चालन गरेयता कार्यक्रममा जोडिएका विद्यार्थीले आफ्नो खर्चका लागि अभिभावक गुहार्नु नपर्दो रहेछ । पढाइ खर्चको अलावा आफ्नो पकेट खर्च पनि पुगेको बताउँछिन् जनप्रियबाट प्राविधिक धारतर्फ एस ईई दिएर बसेकी छात्रा सारा गिरी ।
कतिपय विद्यालयहरु विद्यार्थी अभावमा अर्को विद्यालयसंग एकिकृत भइरहेको अवस्थामा जनप्रियमा भने नयाँ विद्यार्थी भर्ना गर्न आउनेको घुँइचो छ । परीक्षा र लेखा शाखाका कर्मचारी प्रदिप दाहालले आए जति सबैलाई भर्ना गर्न गाह्रो भएको बताउँछन् ।
विद्यालयले प्राविधिक धारमा मात्रै होईन अभिभावकको अंग्रेजी शिक्षाप्रतिको मोहलाई पनि उत्तिकै रुपमा संवोधन गरेको छ । अंग्रेजी माध्यममा नै कक्षा १० सम्म र ६ देखि १० सम्म नेपाली माध्यम पनि दुबै धारमा सञ्चालन रहेको संयोजक रविन श्रेष्ठले बताए । साधारण धारतर्फको शिक्षामा विज्ञान, वाणिज्य, शिक्षा, मानविकी संकायमा कक्षा १२ सम्म सञ्चालनमा रहेका छन् । जनप्रियमा सेवाक्षेत्रका समुदायको किन यति विश्वास बढ्यो त भन्ने प्रश्नमा विव्यस सदस्य गोविन्दप्रसाद दुलाल भन्छन् ‘जनप्रियका शिक्षकले आफ्ना सन्तती आफू कार्यरत विद्यालयमै पढाउँछन् । समुदायले विश्वास नगर्नुपर्ने कुरै छैन ।’ कक्षा ६ मा अध्ययनरत विभान थापामगरका अभिभावक भावना थापामगर बसाइ सरेर चितवन जानुअघि दुखेसो पोख्दै भन्छिन् ‘अब यस्तै विद्यालय पाइन्छ वा पाइन्न, जहाँ कार्यरत शिक्षककै छोराछोरी पनि त्यहीँ पढिरहेका होउन् ।
